Në shportën e konsumit të një familjeje shqiptare nuk mungon kurrë mishi i kuq. Disa zgjedhin ta blejnë në supermarket, të tjerë e ruajnë në ngrirje, kurse një pjesë e konsiderueshme e njerëzve zgjedh ta marrë të freskët në dyqanet e thertoreve. Pavarësisht mënyrës së ruajtjes dhe servirjes, të gjithëve u ndodh të përballen me diçka jo fort të këndshme gjatë gatimit të tij, rrjedhja e vazhdueshme e gjakut. Por nëse ky lëng i kuq nuk është gjak, çfarë është ai?
Shumica e gjakut hiqet nga mishi gjatë therjes. Kjo është edhe arsyeja pse ju nuk shihni gjak në mishin e bardhë të papërpunuar, si p.sh të pulës. Të gjithë mishrat e kuq përbëhen nga një përqindje e madhe e ujit. Kur ky ujë përzihet me një proteinë të quajtur mioglobinë, rezultati është lëngu i kuq që ne shohim. Mioglobina është një proteinë që gjendet në indet e muskujve mishit. Ajo përmban nivele të larta të pigmenteve të kuqe, kështu që sa më shumë mioglobinë të ketë ai, aq më shumë ”gjak” do të dalë nga ai. Në fakt, mishi i kuq dallohet nga i bardhi, në varësi të vlerave të mioglobinës.
