Sali Berisha sulmoi pak ditë më parë Izet Haxhinë gjatë një interviste në TV Dukagjini me gazetarin kosovar Berat Buzhala.
Duke sjellë version të ndryshuar mbi vrasjen e Azem Hajdarit, këtë here duke përfshirë një “nip të Skënder Gjinushit” Berisha e quajti ish-truprojen e tij, vrasësin e Hajdarit.
Në një intervistë me gazetarin Erion Habilaj në DITA, Izet Haxhia, i përgjigjet Berishës, duke e quajtur një “kafshë shpifjesh” dhe thekson se nuk është e rastësishme që intervista është bërë nga Buzhala.
“Duke patur një përvojë shumëvjeçare si pjesëmarrës në shumë ndodhi politike, ndonëse dikur nuk i gjykoja ngjarjet me mendjen e një të paanshmi si sot, por me militantizëm partiak, them me bindje se asgjë nuk ka qenë rastësi në zhvillimet politike që nga viti 90 e deri më sot, as në Shqipëri e as në Kosovë, përkundrazi kanë qenë të ndërthurura e kanë ndikuar mbi njëra-tjetrën.
Nuk është rastësi as 2 korriku i 90-s kur në Kosovë shpallej Republika, në Tiranë hapeshin ambasadat, as ngjarjet e 97-s në Shqipëri kur ra shteti në kohën kur Kosova rrezikonte shfarosjen etnike nga Millosheviçi, as grushti i shtetit në shtator të 98-s në kohën kur lufta çlirimtare në Kosovë kishte hyrë në etapën kritike dhe shumë “koincidenca” të tjera të çuditshme. Ka ekzistuar një qendër antishqiptare dhe ekziston akoma, që ka drejtuar e koordinuar këto veprime antishqiptare.
Dhe për të zbatuar këta skenarë janë gjetur gjithmonë shqiptarë gjakprishur si në politikë, ashtu edhe në media. Dhe dy aktorë të tillë të devotshëm i pamë edhe në monologun e TV Dukagjinit, me Berishën e Buzhalën” – thotë Haxhia.
Ai shpreh habi me sjelljen e intervistuesit gjatë bisedës:
“Çfarë gazetari mund të jesh ti kur zgërdhihesh kur një skizofren mashtrues quan të sëmurë psikik Kryeministrin e vendit amë? Mund ta duash apo mos ta duash Kryeministrin e Shqipërisë për arsyet që di ti, por jo të lejosh apo të zgërdhihesh kur ndaj tij lëshohen fyerje të tilla të denja për një rrugaç. Deri këtu arrin matrapazllëku i gazetarisë, shitja e saj për një grusht euro, përdorimi i saj në mënyrën më të ulët për të goditur kundërshtarin politik sepse ti paguhesh nga politikanë të lartë në Tiranë që kanë bërë sponsorizimin e hapjes së një studio të TV tënde në Tiranë – thotë Haxhia.
Ai tregon edhe një histori me Buzhalën:
“Para një viti njerëzit e tij në TV Klan Kosova u lidhën me mua dhe më kërkuan të bëjmë një dokumentar për Ekspres. I pyeta a ka lidhje me TV Klanin në Shqipëri, më thanë jo. Aty mora vesh për pronarin e saj Buzhala. U thashë që do ju kthej përgjigje. Pasi u interesova për të marrë info për këtë Buzhalën, më doli që ishte një matrapaz që kishte biznese me një serb, që paguhej në Tiranë nga një politikan i lartë për të sulmuar kundërshtarët e tij politikë, që ishte një anti mysliman i tërbuar edhe pse mban emrin turk Berat, që sponsorizohej nga organizata terroriste FETO në Turqi që ka gënjyer në lidhje me emrin e tij sikur paska firmosur deklaratën e pavarësisë së Kosovës. Pra propaganda e shtuar serbo-ruse në Ballkan nuk do gjente ushtar më të mirë për të bërë monolog me kapterin e Serbisë në politikën shqiptare, Berishën, duke u munduar të na e paraqesë atë me mashtrimet e tij, si një kampion të çështjes kombëtare e patriot të flaktë” – thotë Haxhia.
