Kryeministri Edi Rama, duke marrë fjalën në seancën e kësaj të enjteje në Kuvend ka akuzuar sërish opozitën se bojkotoi Parlamentin për të penguar reformat, sidomos atë në drejtësi.
“Bojkoti nisi në javën kur po shqyrtoheshin procedurat e vettingut”, ka thënë Rama, por sipas tij, kjo përpjekje ka edhe një aspekt tjetër.
“Kjo është një përpjekje për të ndaluar që PS të hyjë në zgjedhje. PS është garancia për të mos ndalur reformën në drejtësi. Frika nga drejtësia motivon këtë përpjekje”, ka thënë Rama.
Ai ka theksuar se, ata që kanë frikë nga drejtësia nuk e kanë problem ta çojnë vendin në destabilizim. Ndërsa “një epokë e re për drejtësinë nënkupton një epokë të re për qeverisjen”, ka vijuar Rama.
Sipas tij, kërkesat e opozitës të bëra nga çadra e protestës janë absurde.
“Nuk kam parë ndonjë qeveri që lind dhe jeton për të pasur pëlqimin e opozitës. Partitë që qeverisin nuk e kanë për detyrë të fuqizojnë partitë kundërshtare”, ka thënë Rama.
Ai ka përsëritur gatishmërinë e tij për të diskutuar me liderin e opozitës për zgjidhjen e situatës politike aktuale.
“Jam i gatshëm për të biseduar dhe unë vetë do të preferoja në çadër. Kam dy ditë që pres vendin dhe orën për të folur”, ka pohuar Rama, duke shtuar se, opozita i ka patur të gjitha mundësitë për të folur në Kuvend.
