Avokatura e Shtetit e cila ndjek nga afër çdo çështje arbitrazhi që hapet nga palë të treta ndaj shtetit shqiptar apo anasjelltas, është kështilluar që të zgjedhë me kujdes studio ligjore të huaja që e asistojnë. Në një raport të Kontollit të Lartë të Shtetit nënvizohet se nuk ka pasur kritere shumë specifike për përzgjedhjen e tyre. “Këto kritere janë me karakter përgjithësues, duke lënë hapësira të konsiderueshme që përzgjedhja e kompanisë fituese të jetë subjektive dhe e pa mbështetur në evidencat përkatëse” thuhet ne raportin e KLSH.
Lidhur me këtë KLSH ka rekomanduar që Avokatura e Shtetit të hartojë një udhëzim apo manual të brendshëm ku të parashikohen në mënyrë specifike kriteret e përzgjedhjes. Së pari kriteri çmim i konsulencës rekomandohet që të llogaritet duke ju referuar kontratave të ngjashme që Shteti Shqiptar ka lidhur, ose, në mungesë të tyre, të bazohet në tarifa të kontratave me karakter të ngjashëm në tregun privat të vendit.
“Vlen të theksohet se, në hartimin e kriterit “çmim” duhet të merren parasysh edhe kufijtë brenda të cilave buxheti i Shtetit Shqiptar i ka mundësitë financiare për të paguar një zyrë të huaj avokatie për këtë përfaqësim në arbitrazhin ndërkombëtar, pra të vendosen tavane tarifash në dërgimin e ftesës për negociata” thuhet në rekomandimin e KLSH.
Së dyti ky insitucion ka nënvizuar kriterin specialiteti apo ekspertiza profesionale që nevojitet të detajohet në mënyrë që konkurrentët të ofertojnë duke faktuar njohuritë që disponojnë në fushën e kërkuar të ekspertizës. Kjo sipas KLSH duhet të bëhet nëpërmjet paraqitjes së dokumenteve/evidencave përkatëse të mjaftueshme dhe të besueshme,dhe jo thjesht nëpërmjet një deklaratë pohuese nga ana e ofertuesit, sikundër është vepruar deri tani. “Vetë deklarimi në këto raste nuk është evidencë e mjaftueshme dhe e besueshme për të marrë siguri mbi vërtetësinë e pohimit(aftësitë e provuara të ekspertizës)” vlerëson raporti.
Së treti rekomandohet se cili duhet të jetë kriteri bazë në përzgjedhjen e studiove që mbrojnë interesat e Shqipërisë në gjykatat ndëkrombëtare. “Kriter bazë për përzgjedhjen e studiove ligjore të avokatisë të jetë “numri i çështjeve të fituara në raste dhe procedura të ngjashme”, të cilat të faktohen me dokumente/evidence përkatëse të mjaftueshme dhe të besueshme dhe (si psh. vendime të arbitrazhit ndërkombëtar të fituara në fushën e kërkuar të ekspertizës), dhe jo thjesht nëpërmjet një deklarate pohuese, sikundër është vepruar deri tani” nënvizon Kontolli i Lartë i Shtetit.
