Qytetarët janë në shesh për të luftuar të gjithë “bandën” politike, e cila sot po jep frymë
Mijëra qytetarë nga çdo cep i Shqipërisë i janë bashkuar sot protestës masive, për t’i dhënë një goditje të madhe politikës së krimit dhe korrupsionit. Protesta e thirrur nga opozita ka marrë zërin e qytetarëve shqiptarë, të cilët të lodhur në masë nga kjo “bandë” politike që i ka sfilitur për vite me radhë, janë ngritur për të shënuar triumfin e parë.
Protesta e sotme është fitorja e parë e shqiptarëve, të cilët pritet të gjunjëzojnë politikën e korruptuar dhe të inkriminuar. Marshimi i mijëra qytetarëve sapo ka nisur drejt Kryeministrisë, ku do të vendosen para zyrës së Edi Ramës për të kërkuar largimin e tij.
Kjo është protesta me pjesëmarrjen më masive, ku pak muaj para zgjedhjeve lokale të qershorit, shqiptarët duken të vendosur për të rrëzuar qeverinë e krimit. I frikësuar nga ky tubim masiv, kryeministri Edi Rama është larguar për në Vlorë. Siç duket, Rama e ka ndjerë fundin e tij politik dhe nuk ka pasur guxim të përballet me qytetarët, me të cilët është tallur për gjithë këto vite.
Nga ana tjetër, protestës para Kryeministrisë i janë bashkuar edhe forcat politike opozitare. Kreu i Partisë Demokratike, Luzim Basha, dhe kryetarja e LSI, Monika Kryemadhi, kanë dalë nga selitë e partive të tyre dhe janë nisur drejt Kryeministrisë, për t’iu bashkuar protestës.
Vetë Basha dhe Kryemadhi kanë deklaruar se nëse sot do të dështojnë, do të largohen nga politika, ose në të kundërt do të jetë Rama ai që do të ikë. Tashmë, e sigurt është që qytetarët janë në shesh për të luftuar të gjithë “bandën” politike, e cila sot po jep frymë.
