E paralajmëruar prej ditësh, tashmë kanë mbetur vetëm pak orë që qytetarët shqiptarë të nisin protestën e thirrur nga opozita.
Tubimi është paralajmëruar të nisë në orën 11:00 përpara kryeministrisë, por prej ditës së djeshme pengesat e qeverisë kanë qenë të shumta. Disa të denoncuara opozita e të tjera të konstatuara edhe nga mediat.
Prej orëve të para të mëngjesit qytetarë nga e gjithë Shqipëria janë nisur drejt Tiranës, ndërsa opozita paralajmëron se do të jetë dita e tyre. “Sot politika hesht, do flasin qytetarët”, tha theksuar deputeti demokrat, Flamur Noka.
Ora 10:30 Basha mbërrin në selinë blu, e lë enigmë skenarin e protestës
Kreu i PD-së Lulzim Basha ka mbërritur para pak minutash në selinë blu, ku është takuar me simpatizantët që kanë qenë të pranishëm aty. Basha pritet që të marshojë drejt kryeministrisë rreth orës 11:00, i shoqëruar nga një grup të rinjsh.
Kreu demokrat nuk ka pranuar të bëjë asnjë koment për gazetarët, ndërsa mbetet ende mister si do të vijojë protesta. Ndërkohë që tek kryeministria pritet që të jenë sot rreth 1500 punonjës të policisë dhe të gardës.
Zëra thonë se mund të ketë një skenar për djegien e mandateve të deputetëve, ose një skenar të përsëritur të çadrës dhe ngujimit.
Ora 10:00 PD: 50 mijë qytetarë nga rrethet drejt Tiranës për të protestuar
PD ka dhënë një informacion paraprak në lidhje me numrin e protestuesve të saj që janë nisur nga rrethet.
Sipas selisë blu, më shumë se 50 mijë qytetare dhe simpatizante demokratë kanë udhëtuar nga qytete të ndryshme të Shqipërisë për të qënë në protesten para kryeministrisë.
PD madje ka dhënë edhe shifra konkrete të simpatizanteve të saj të nisur për çdo qark.
Qarku Shkodër – 8000 qytetarë
Qarku Lezhë – 6800 qytetarë
Qarku Kukës – 4000 qytetarë
Qarku Dibër – 3500 qytetarë
Qarku Durrës – 9100 qytetarë
Qarku Elbasan – 7500 qytetarë
Qarku Berat – 3000 qytetarë
Qarku Fier – 4800 qytetarë
Qarku Vlorë – 4500 qytetarë
Qarku Gjirokastër – 2000 qytetarë
Qarku Korçë – 4200 qytetarë
