Po shohim e dëgjojmë çudira e qyfyre nga politika shqiptare, brenda parlamentit ku ishte mbledhur “Asambleja e popullit” të PS dhe jashtë kangjellave të tij, ku protestonte “populli” i partive të PD-LSI.
Po veçojmë tre nga këto çudirat, që tregojnë, se deri në çfarë degradimi moral e intitucional, ka precipituar politika, parlamenti, qeveria dhe institucioni i protestës në Shqipërinë e pas afro 30 viteve demokraci.
ÇUDIA E PARË/ Në parlament, ku duhej të diskutohej kriza e rëndë politike, sociale dhe ekonomike, që ka mbërthyer vendin, popullin e shtetin, kryeministri dhe shefi i partisë në pushtet, Edi Rama, veproi tamam sikur ishte në mbledhje lagjeje, kur kërkoi të fliste i pari, sepse do të shkonte në Itali! A mund të lihet vendi nga kryeministri që ka shkaktuar krizën, në këtë katrahurë, për të bredhur nëpër botë, qoftë edhe sikur të jetë takim i nivelit të lartë?!
ÇUDIA E DYTË/ Në fjalën para protestuesve, kryetarja e LSI, Monika Kryemadhi, deklaroi se nuk do tërhiqet, përballë presionit dhe dhunës së pushtetit të Edi Ramës, duke kujtuar, se ajo nuk është trembur as nga kërcënimet e diktaturës komuniste në vitin 1990 dhe, as përballë plumbave të pushtetit në vitin 1997. Çudia është, se në vitin 1997, demokratët e dinë, që Monika dhe Iliri, u ngritën kundër plumbave të pushtetit të Berishës.
ÇUDIA E TRETË/ Në krye të protestës, është edhe djali i Azem Hajdarit, duke deklaruar se kush nderon veprën e babait të tij, duhet të jetë në krahë të Sali Berishës, Lulzim Bashës, Klevis Balliut e Ervin Salianjit, të cilët po “i shajnë” motrën, duke ia quajtur “tradhtare të idealeve të Azemit”.
Nisur prej kësaj çudie, deri diku dhe komike, demokratët janë vënë në hall, mbasi nuk dinë se cilin të mbështesin: Djalin që është me Saliun e Lulin, apo vajzën e Azemit që ka dalë kundër tyre?
Ndoshta, çudia mund të marrë përmasa të tjera në familjen Hajdari, sepse mund të ndodh, që pas disa ditësh, Fatmira Hajdari, të mbështesë kryeministrin Rama dhe krye-parlamentarin Ruçi, nga halli i “Veting”-ut për të mos humbur vendin e punës (lekëve), siç bëri vëllai i Azemit në vitin 1990, që nga frika mos e përjashtonin nga PPSH dhe puna si instruktor në komitetin e partisë të Tropojës, quajti Azemin “tradhëtar”./Burimi : Pamfleti
