Presidenti i Kosovës, Hashim Thaçi i ka dërguar një letër me sqarime ligjore për ushtrinë e Kosovës sekretarit të përgjithshëm të NATO-s, Jens Stoltenberg
Thaçi shpjegon se ndryshimi i saj mund të bëhet vetëm me dy rrugë, e para ndryshimi i Kushtetutës me dy të tretat e votave të serbët të cilët të komanduar nga Serbia, e cila nuk e njeh Kosovën shtet nuk do të jepen kurrë për këtë qëllim. Së dyti me propozimin për ndryshimin e ligjit ekzistues dhe shndërrimin e misionit e që mund të miratohet me një shumicë të thjeshtë të votash.
Duke argumentuar përse ai e ndërmori këtë veprim, Thaçi thotë se Kosova duhet të sigurojë mbrojtjen e saj territoriale në një kohë që siç shprehet ai kaq shumë gjëra po ndryshojnë në mbarë botën dhe aktorë të rinj janë të etur për të zgjeruar ndikimin e tyre edhe në rajonin tonë.
“Serbia, duke qenë e mbështetur fuqimisht nga Rusia, nuk ndan të njëjtin qëllim me Kosovën, pra që të bëhet anëtare e NATO-s. Përkundrazi, Serbia ende ka pretendime ndaj territorit të Kosovës dhe vazhdimisht po merr gjithnjë e më shumë armatim nga Rusia, duke përfshirë aeroplanët luftarakë rusë MiG-29”, shkruan ai në këtë letër drejtuar përfaqësuesve të NATO.
Thaçi thotë se shndërrimi i FSK nuk është akt i njëanshëm dhe se i tillë do të ishte vetëm nëse siç ka thënë Stoltenberg do të duhej mbështetja e Serbisë.
“Shpreh keqardhje që në cilësinë tuaj si Sekretar i Përgjithshëm i NATO-s ju keni paralajmëruar pasoja të mundshme në kuptim të bashkëpunimit në mes FSK-së dhe NATO-s në rast të ndryshimit të mandatit të FSK-së. Unë e kam marrë këtë paralajmërim shumë seriozisht dhe më vjen keq shumë që ju i keni bërë publike këto pasoja menjëherë pas ndërmarrjes së nismës ligjore. Duke pasur parasysh respektin më të madh për NATO-n dhe shtetet anëtarë të saj, më duhet të theksoj se Kosova është e vendosur për të përfunduar këtë proces në një mënyrë transparente dhe gjithëpërfshirëse” përfundon letra e presidentit kosovar drejtuar NATO-s.
