Ish- ministriiI Brendshëm Saimir Tahiri duket se e ka marrë seriozisht si sfidë angazhimin në krye të Qarkut të Tiranës.
Ai ka mbushur sot Pallatin e Sportit dhe mjediset jashtë tij me mijëra socialistë, që duket se janë të motivuar për një fushatë të fortë elektorale.
Tahiri, i cili është shkarkuar në fundjavë nga kryeministri Rama, po perceptohet në publik si viktimë e LSI dhe duket se po tërheq një mbështetje të madhe politike brenda partisë, pas kësaj.
Në fjalën e tij Tahiri ka thënë se të respektosh njerëzit e thjeshtë është shumë më e vlefshme sesa të respektosh ekuilibrat e politikës së madhe. Sipas tij politika mban në ekuilibër vetëm pushtetin por çekulibron vendin.
Po ashtu ai shtoi në fjalën e tij se sa më e madhe të jetë përpjekja për ta penguar dikë aq më e madhe është dëshira e fuqia për të punuar.
“Sado të mundohem dhe jam mundur jo pak më besoni, nuk arrij dot kurrë të gjej aq fjalë për të falenderuar secilin prej jush.
Të punosh ia vlen më shumë se sa të flesh gjithë ditën, të punosh ia vlen më shumë se sa të flasësh gjithë ditën.
Të respektosh njerëzit e thjeshtë, ia vlen më shumë se sa të respektosh ekuilibrat e politikës së madhe që në ekuilibër mbajnë vetëm veten në pushtet duke çekuilibruar Shqipërinë, që më treguan mua se sa do e madhe gënjeshtrat, llumi dhe akuzat, sado i madh sulmi nga fronti i së keqes, ne kemi sy, kemi mendje, kemi shpirt, kemi zemër për të parë të vërtetën dhe për të punuar; që më treguan mua se sa më e madhe pengesa, aq më e madhe fuqia për të punuar për Tiranën dhe Shqipërinë”, tha Tahiri para strukturave të PS-së në Tiranë.
Duke folur para të pranishmëve, Tahiri u ndal tek reforma në drejtësi dhe akuzoi opozitën se synon bllokimin e saj.
“E shkuara futet në çadër. Janë mbledhur në një çadër për të mbrojtur njëri-tjetrin dhe të gjithë bashkë për të mbrojtur gjyqtarët dhe prokurorët e korruptuar”, tha ai.
Sipas Tahirit, Shqipëria nuk do të kthehet pas dhe nuk do të mbahet peng e ardhmja.
