Jemi në muajin e fundit të dimrit, megjithatë dimirin nuk e kemi lënë aspak pas, teksa në ditët në vijim do do të kthehet acari në vendin tonë.

Sipas Meteoalb, duke nisur nga dita e nesërme, e premte, i gjithë territori shqiptar do të mbizotërohet nga temperatura ekstremisht të ulëta.

Kështu, pritet që në zonat malore temperaturat të shkojnë deri në -16 gradë Celcius dhe kjo ulje drastike, vjen si pasojë e masave ajrore të cilat zbresin nga veriu-verilindja e kontinentit evropian.

Po ashtu edhe vlerat maksimale do të ulen ndjeshëm, duke bërë që në zonat malore 24 orëshi të jetë vetëm me vlera negative.

Ndërkohë parashikohet që i gjithë territori i vendit do të përfshihet nga reshje dëbore gjatë fundjavës. Reshjet do të prekin 95% të Shqipërisë dhe sasia në zonat veri-lindore dhe jug-lindore pritet të jetë 30-50 centimetër. Madje pritet që reshie dëbore të ketë edhe në Tiranë e Durrës gjatë mbrëmjes së të shtunës dhe orëve të para të së dielës.

Acari pritet që të zgjasë deri në fundjavën e ardhshme ndërsa pritet që kjo të jetë java më e ftohtë e dimrit për këtë vit.